නිදයි පොඩි පුතු මගේ

 සුමුදු යහනට සුසුදු සඳ දිය 

                                        ගලා එයි රැය දිගේ

සුනිල තරු කැට වසා නෙත් යට 

                                            නිදයි පොඩි පුතු මගේ

සිනිඳු කෙහෙරැලි ගැටී සුළඟට 

                                            කරයි මුව මත දඟේ

නිදන පුතු දෙස බලා හිඳුමද 

                                                භාවනාවක් වගේ

වලාකුලෙන් වැටෙන, සඳේ කිරණක් ගෙන අතේ         තබමි

ඒ එළියෙන් හිනා බිංදු උපදින හැටි බලා                 හිඳිමි

පැහැයක් නැති බිළිඳු සිතේ ඇඳි සිහිනය සිතින්         දකිමි

ඒ සිහිනේ කොනෙක මමත් නිවෙමි, නිවීලා          සැනසෙමි

 

 

 

 

 

 

 

 

 

 

© Kalani Ruwanpathirana
 

-2021.09.17

සරා සඳ | Weak Moon

සැඳෑ හිරු මියෙන සඳ
උදා වනු කිමද සඳ
උදා හිරු නැගෙන සඳ
පලා යනු කිමද සඳ


නිදන සඳ මහී ලඳ
උදා වන සරා සඳ
පොකුරු තරු පිපෙන සඳ
සිනාසෙයි රුසිරු විඳ


සැලෙන මල් කැකුළු කොඳ
රැහැයි නද වූ නො මද
නිවී දිදුලන තරු ද
දුබල යැයි කියයි සඳ


නමුදු ඝණඳුර නො මද
කැළුම් දී මදින් මද
නසන සඳ වී සු හද
නුඹම වේ මගේ සඳ

© Kalani Ruwanpathirana
--1998